თამაშის წესები
`ყაზარმა~ - ბრიტანული რეალითი შოუს ლიცენზირებული ფორმატია. აქ 16 მონაწილე დიდი ფულადი პრიზის მოსაგებად იბრძვის. მოქმედება ხდება ყაზარმაში, რომელიც ბრიტანულ ვარიანტში საგანგებოდ პროექტისთვისაა შექმნილი. ქართული ვერსია სრულიად უნიკალურია იმ მხრივ, რომ საქართველოს თავდაცვის სამინისტროს ხელშეწყობით შესაძლებელი გახდა ამ პროექტის ნამდვილ ყაზარმაში განხორციელება. ქართული `ყაზარმის~ მონაწილეები იცხოვრებენ მუხროვანის განთქმულ სამხედრო ნაწილში, რომელიც უძველესია საქართველოს ტერიტორიაზე და 200 წელს ითვლის.

16 მონაწილე (8 ქალი და 8 კაცი) 2 თვის განმავლობაში რიგითი ჯარისკაცის ცხოვრებით იცხოვრებს. ისინი ნამდვილ წვრთნებში მიიღებენ მონაწილეობას და შეღავათებით არ ისარგებლებენ. მონაწილეები ექვემდებარებიან ნამდვილ ინსტრუქტორებს მე-4 ქვეითი ბრიგადის სერჟანტებს.

2 თვის განმავლობაში მონაწილეებმა უნდა დაძლიონ 14 სამხედრო მისია. წარმატების შემთხვევაში გუნდი ჯილდოვდება, დამარცხების შედეგად კი ისჯება.

თითოეული მონაწილე მისიის შესასრულებლად როგორც ფიზიკურად, ისე სტრატეგიულად ემზადება. მისიის წინ სერჟანტები ირჩევენ ლიდერს, რომელსაც ამ მისიის შესრულებაზე პასუხისმგებლობა ეკისრება.

ყოველი მისიის შემდეგ გუნდი გაგდების პლატოზე იკრიბება და საგანგებო ტრიბუნალზე წყვეტს, რომელი მათგანი დატოვებს პროექტს. თუ გუნდი მისიაში გამარჯვებულია, ლიდერი სარგებლობს იმუნიტეტით _ ამ ჯერზე მას ვერავინ დაასახელებს. თამაშს ტოვებს ის, ვისაც მონაწილეთა უმრავლესობა გაწირავს.

ფინალში გასულ კონკურსანტებს მარათონი აქვთ _ 48 საათის განმავლობაში მათ არ უნდა დაიძინონ და ერთმანეთს შვიდი ურთულესი სამხედრო დავალების შესრულებაში უნდა შეეჯიბრონ. ამ დავალებების შესახებ წინასწარ არაფერი იციან. გამარჯვებული, რომელიც 40 ათას ლარს იგებს, ფინალურ ლაივშოუზე გაირკვევა! ფინალური ლაივშოუ პირდაპირ ეთერში გაიმართება და გამარჯვებული საერთო კენჭისყრის საფუძველზე გამოვლინდება.

`ყაზარმა~ ეთერში 15 კვირის განმავლობაში კვირაში ერთხელ გავა.